مع انى بشوفك فى احلامى
وقبل ماتطلع شمس اليوم
على عيونى ...
وقبل ماتمدى ايديكى
فى الهوا ... تصحينى
ولما ياخدنى القلب
يطير بيا فى سماكى
يغنى للحب هواكى
وقبل ما اقول
وحشتينى
اسمع انا صوت عصافيرى
تناديكى ...
وكأن الكون كله
معايا ... فى ندايا
يغنى غنايا
وحشتينى
بحسك جوا فى قلبى
بتحيى نبض جوايا
تخلينى زى طفل صغير
شاب العمر منى ...!
وانا لسه بحبك عايش
كأن بعادنا ماطول
ولا غبتى فى بعدك يوم
رسمتك جوا فى عيونى
قمره فى ليلى مرسومه
وضحكه جميله من قلبك
تصحى الشوق وهوايا
يا اجمل حب انا عايشه
ودى حكايه .... ودى روايا
ولسه بغنى انا حبك
لانك عايشه جوايا
بحبك مهما شاخ العمر
لانك نسمه لهوايا
وصوتك كل ما ببعد
ينادى الشوق ويايا
وحشتينى
ولسه كمان بتوحشنى
ياساكنه القلب وندايا
عبيرك كل يوم بيمر
على بابى
وانا من شوقى .... وهوايا
افتح تانى شباكى
واغنيلك .....
وحشتينى ...!!
عطا الاسيوطى
ليست هناك تعليقات:
إرسال تعليق