ياولاد ان جه الموت
ونده على ابوكم
قولو انه كان .... تاعبنا وياه
كان بيحس باللى مش حاسس بيه غيره
ويعذب روحه معاه
على ايه
مش عارفين
بس قولو انه
كان بيحب يساعد
اللى ليه
واللى مالوش قلب
يحس بيه
قولو
كان قلبه دايما حزين
مليان وجع وانين
كان بيعرف ناس
قلبها زى السكين
وماتحسش باللى تقوله
وبتنام الليل بطوله
وهو زى .... ماهو
عاش حزين
ومات حزين
مسكين يابن ادم
لو متعرفش
يعنى ايه واحد
حزين
وانتى يابت ...
اوعى تعلى الصوت على ابوكى
ابوكى ماماتش
لسه عايش فى قلوبكم
جوه ...عيونكم
والصوره اللى متعلقه
فى البرواز
شيليها
واوعى تحطيها
بعد ما اموت
انا روحى وياكم
سمعاكم
شيفاكم
وادعولى دعوه
فى يوم بيكون القلب
فيه مهموم
هتلاقو بعد الضلمه نور
والليل بئ فيه قمر بيدور
والشمس هتطلع
مش برضو انا عايش
وياكو
لوجه الموت على ابوكم
قولو ...
كان عايش مهموم
والدنيا من بعده ...
لازم تتعاش فى النور
عطا الاسيوطى
ليست هناك تعليقات:
إرسال تعليق