ولملمت حروف اسمك
اللى تايه من سنين
ولمحت جوه الضلمه نور
من عيونك اللى كانت سبيل
واتشكلت احلامى تانى
بعد ما تاه الحنان
ويادوب لحقت بعض ايامى
كنت شايلهم عشانك
اتبعترو منى بعيد
من بعد اخر عيد
اتسجن جوا تابوت
لميت ملامحك .... ورسمتها
فى يوم جديد
يوم رجوعى للحياه
حبة رتوش اتشكلو
ورسمت بيهم صورتك انتى
وكتبت .... تحتها
عادت حياتى من جديد
والذكرى اللى صوتها منى اتنبح
رجعت تغنى من جديد
اغانى الحب السعيد
مبقاش فى صوتى
غير حروف اسمك انتى
اللى اتولدت فى عمرى من جديد
وزاح كل الاسامى ...
مبقاش فى صوتى نغمة الناى الحزين
بدلتها بصوت البلابل
وبعزف معاها اجمل الالحان
لاسمك انتى
بلحن غير كل اللى فات
بغنوه غير كل الاغانى
لااسمك انتى
وحبك اللى مالى البلاد
اسمك انتى .... اسم غالى
اسم غير كل الاسامى
عطا الاسيوطى
ليست هناك تعليقات:
إرسال تعليق