يامنه
والله وشبت يا عبد الرحمان ....
عجزت يا واد ..؟
مسرع ؟
ميتى وكيف ؟
عاد اللى يعجز قى بلاده
غير اللى يعجز ضيف ..!!
هلكوك النسوان ؟
شفتك مره فى التلفزيون
ومره .. ورونى صورتك فى الجورنال
قلت : كبر عبد الحمان..!!
أمال انا على كده مت بقى لى ميت حول ..!!
والله خايفه يا وليدى القعده لتطول .
مات الشيخ محمود
وماتت فاطنه اب قنديل
واتباع كرم اب غبان
وان لسه حيه ..
وباين حاحيا كما وكمان ..
عشت كتير ..
عشت لحد ماشفتك عجزت يا عبد الرحمان..
زقالولى قال خلفت
وانت عجوز خلفت يا اخوى ؟؟
وبنات ..!!؟
امال كنت بتعمل ايه طيلة العمر اللى فات ؟
دلوقت ما فقت ؟
وجايبهم دلوك تعمل بيهم ايه ؟
على كل .. أهى ريحة من ريحتك ع الارض
يونسوا بعض ..
ماشى يا عبد الرحمان..
أهو عشنا وطلنا منك بصه وشمه ..
دلوك بس ما فكرت ف يامنه وقلت : ياعمه ؟
حبيبى انت يا عبد الرحمان
والله حبيبى ... وتتحب .
على قد ما سارقاك الغربه .. لكن ليك قلب ..
مش زى ولاد الكلب اللى نسيونا زمان ..
حلوه مرتك وعويلاتك .. والا شبهنا ..؟
سميتهم ايه ؟ قالولى آيه ونور .
ماعارفشى تجيب لك حتة واد ؟
والا أقولك :
يعنى اللى جبناهم .. نفعونا فى الدنيا بايه ؟
غير شى الانسان مغرور ..!!
ولسه يامنه حاتعيش وحاتلبس
لما جايب لى قطيفه وكستور ؟
كنت اديتهمنى قلوس .. اشترى للركبه دهان ..
آ ..ى ما مجلع قوى يا عبد الرحمان ...
طب ده انا ليا ست سنين
مزروعه فى ظهر الباب ..
لم طلوا علينا أحبه ولا أغراب ..
خليهم ........ ينفعوا ....
أعملهم أكفان ..!!
كرمش وشى
فاكر يامنه وفاكر الوش ؟
اوعى تصدقها الدنيا .. غش ف غش ..!!
اذا جاك الموت يا وليدى .. موت على طول ..
اللى اتخطفوا فضلوا أحباب .. صاحيين فى القلب
كان ماحدش غاب .
واللى ماتوا حته حته .. ونشفوا وهم حيين ..
حتى سلامو عليكم مش بتعدى من بره الأعتاب ..
أول ما يجيك الموت .. افتح ..اول ماينادى عليك اجلح.
انت الكسبان ... اوعى تحسبها حساب ...!!
بلا واد .. ولا بت .. ده زمن يوم ما يصدق .. كداب ..!!
سيبها لهم بالحال والمال وانفد .. اوعى تبص وراك ..
الورث تراب .. وحيطان الأيام طين ..
وعيالك بيك مش بيك عايشين ..!!
يو ...ه يا رمان .. مشوار طولان ..
واللى يطوله يوم عن يومه يا حبيبى حمار
الدوا عاوزاه لوجيعة الركبه ..
مش لطوالة العمر ....
اوعى تصدق ألوانها صفر وحمر ..
مش كنت جميله يا واد ؟
وجدعه تخاف منى الرجال ..؟
لكن فين شفتونى ..؟ كنتوا عيال ..!!
بناتى رضيه ونجيه ماتوا وراحوا .. وأنا اللى قعدت
طيب يا زمان ..!!
اوعى تعيش يوم واحد بعد عيالك ..اةعى يا عبد الرحمان ..,
فى الدنبا أوجاع وهموم أشكال والوا ن ..
الناس مابتعرفهاش ... اوعرهم لو حتعيش
بعد عيالك ما تموت .. ساعتها بس ...
حنعرف ايه هوه المو ت ....!!
اول ما يجى لك .. نط .. لسه بتحكى لهم بحرى حكاية
فاطنه وحراجى القط ... ؟
آ .. باى ماكنت شقى وعفريت من دون الولدات . كنت مخالف
براوى ... وكنت مخبى فى عينيك السحراوى .. تمللى حاجات ..
زى الحدايه .. تخوى ع الحاجه .. وتطير .من صغرك بضوافر واعره ومناقير .
بس ماكنتش كداب .. وآدينى أستنيت فى الدنيا لما شعرك شاب ..
قدم البيت .. اتهدت قبله بيوت وبيوت .. وأصيل هوه .. مستنينى لما اموت ..!!
حانيجى العيد الجاى ؟ واذا جيت .. حاتجينى لجاى ؟
وحتشرب مع يامنه الشاى .؟؟ حاجى ياعمه ... وجيت ..لا لقيت يامنه ولا البيت ..!!
( عبد الرحمن الابنودى

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!

(صلاح جاهين )

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي !!! (صلاح جاهين )

بيقولوا عليا شاعر :

#########

بيقولوا عليا شاعر والله وكلامه واعر

دالشعر اصله حنان ويا الحبيب يتقال

ويا الوصال فرحان ...ويا الفراق حزنان

والشاعر هو الغلبان ...دايما للقلوب هيمان

دايما يكتب غناوى ...وكمان بقول حكاوى

تتقال على القهاوى ...

كلمه فى موال ... وكلام كتير يتقال

اصل الحب واعر ... يهز قلب الشاعر .

(حبات القلوب )

احبك الف مره

بحبك .....

بحبك الف مره ... ومره ...

واحبك وقت شروق الشمس

ووقت الغروب مره .....

احبك فى ليلة قمر ...

ووقت مايطول السهر ... مره

واحبك جوه قلبى تعيش معاكى ولو مره

احلم معاكى بكل نسمة صيف ...

ووقت نزول المطر لو مره ...

معاكى عمرى كله ... واقول ...

احبك .... الف مره ....ومره ...

( حبات القلوب )

لحظة ميلاد

رفيقة العمر :

زوجتى يارفيقة العمر انى لك بالحب والحنان اغنى

انت نصفى خلقت لى قدرا فى ازل الغيب منذ جنةعدن

نصفى الحلو كنت منذ الصبا ابحث عنه وكان يبحث عنى

وعرفت الكمال منذ التقينا واستقرت عليك وحدك عينى

وجئتى لعمرى بهداياكى ... هذا قمر مشرق ينير حضنى(اسماء)

ثم شمس بدفئها غمرت قلبى (عبد الرحمن)....

كل يوم اسجد لله شكرا وامتنانا على زواجك منى ....

اهداء الى حبات القلوب الحقيقيه ( اسرتى الصغيره الكبيره)

بتوحشنى

بتوحشنى :
بتوحشنى ...

وبينى وبينك شوق وحنين ... وانا وياك

وتوحشنى ...

وانا والشوق بنتونس فى ليل عاشقين .
وتوحشنى ...

ومهما البعد ليله طويل ...

بتوحشنى ..
بصبر روحى بكلامك ...

وعيونك ونظرة شوق بتخطفني ... أقول انا مين
وتوحشنى ...

ومش عارف لمين اشكيك ...

واقول ف كلام بيشرحلى ... يعرفنى ... ف قلبى انا مين ...

وتوحشنى....
واعود اسرح فى ايامى ... واحلامى... بشوق وحنين
واحن ليوم يرجعلى صبا قلبى ...عشان اقدر احب هواك
وتوحشنى ...

ومهما البعد ليله طويل ...بصبر قلبى عالمكتوب
وباكتب كلمة من حرفين مع اسمك ...

وتوحشنى ...
وكل يوم يكبر هواك ... واحلم اكون نجم فى سماك ..

وتوحشنى
بتوحشنى ... وانا اعمل ايه ...

بتوحشنى ...
( حبات القلوب )

حدوته :
احكيلك حدوته ... يحكوها الصبايا تحت التوته ... زمان الحب كان وكان ... كان الزمان مليان حنان ... كان فيه شاب اسمر جميل
لون سماره لون مية النيل وشعره اسود لون الليل ... وكان عاشق يحب الليل ... يحب يقول مواويل عن العشق والعاشقين ... كان بيحب زمان ... ولما غدر بيه الزمان ثار زى البركان ... حلف مايرجع للحب والاحلام ... وصار عطشان والنيل قدامه مليان ... ولكن الشاب الغلبان ... حلف لا يتهان ولا ينظر للميه وهو عطشان ... وراح يمشى فى البلدان ... يقول قصته ... لكل عاشق داق الحرمان ... ويصبره على اللى كان ... وسافر هنا وهناك ... وصار يجلس تحت التوته ، يحكى حدوتة للصبيان ، يقولهم :
كان ياماكان ... كان فيه زمان شاب اسمر غلبان ، حب صبيه عيونها عسليه ، وشعرها نازل على جبينها لون سواد الليل ، كان يكلمها ويحن للقاها ، وكانت هى كمان زيه تمام ، تحب لقاه وكانوا الاثنين لايبعدوا عن بعض ، كانوا يعشقوا بعض ، وكانوا يحكوا كل اللى جواهم ، وكانو يشكوا من الزمن والايام جفاهم ، حبوا بعض فى وقت مالهوش آذان ، لكن الشاب الغلبان كان للحب عطشان ، والنيل فى عيون الصبيه مليان وكله حنان ، الشاب الغلبان شرب شربة حنان ، ووقع اسير الحب ، وراحوا يحكوا حبهم لجيرانهم من الصبايا والصبيان كانوا بيتباهوا بحبهم ولم يعلموا غدر الزمان ، لكن الشاب الغلبان قعد يحب الصبيه ويكتب فيها شعر وتمثيليه ، وكانت هى تحلم بانها مستنيه فى دار ابوها ، ويطلب ايديها ويخطفها على حصانه الابيض ويروح لداره ، ويغنيلها اغنيه ، لكن الحلم ياولاد مكملش ، لان الزمان سباق يستخبى للعشاق وينهى التمثيليه .(حبات القلوب )

جبل بيتكلم

عجبى عليك ياجبل
لما تزيح همك
ترمى الحجاره ياجبل
ولا حد بيهمك
دى قلوب كتير زيها
ولا حد بيقولك
اكتم همومك ياجبل
تتعلم الناس منك
وعجبى ( حبات القلوب )

جبل الدويقه

جبل الدويقه ثار ... من طلعة النهار...
وقبلها بنهار ثار ... ولا حد دمه حار..
قصور بتتبنى اعلاه ...
واحنا فى حضن هواه... تروينا مياه صرفهم
ولا حد سأل فينا نصرخ نقول الأه يرد الصخر آهات..

(حبات الهموم )وليس القلوب ..عذرا

ثورة جبل

ياجبل خليك رحيم بينا
ياجبل اوعاك توارينا
داحنا غلابه ياجبل
حضنك مدفينا
وزمنا قاسى ياجبل
خليك رحيم بينا
نايمين فى حضنك ياجبل
زى الطيور جينا
داحنا غلابه ياجبل
اوعاك تثور فينا
لا حد يسأل ياجبل
ان روحنا او جينا

نافذة الامل:
الامل ... يجب ان نبقيه دائما وابدا
شمعه مضيئه فى اعماقنا .........
ولتكن نافذتنا على الامل والضوء والدفئ.

حال العشاق



 

وانا الاشواق بتكوينى

لمين بالحب احكيله واغنيله

عن كل همسه بدوب فيها

ان كان قريب يغنيلى

 ويروينى ويشجينى

وان كان بعيد يواسينى

ويبعتلى جواب يهدينى

وان كان مالوش فى العشق خلاص

يسبنى فى حالى وينسانى

حبيبى رحل بعيد عنى

وخاصمنى وجفانى

دانا من يوم ماغاب عنى

النوم كمان رحل عنى

كل ماانام الجاه

فى احلامى قصاد عينى

احن اليه واجرى عليه

واقوم من النوم القانى

غريب ولوحدى من تانى

دانا من يوم ماغاب عنى

القلب خلاص تعب منى

دانا مش ممكن انساهم

وقلبى كمان ماينساهم

لمين بالحب اغنيله .

عطا الاسيوطى

                          لمين احكى حال العشاق 

كان زمان الحب

كان زمان الحب كلمه
كان قصيده كان فى غنوه
كان حنان كان سلام
كان نهارنا كان فى ليلنا
كان ننور بيه ديارنا
كان وليد فى المهد بيننا
دلوقتى اصبح طير لغيرنا
بات حزين مكسورمابيننا
شاف دموع تسكن عيوننا
شاف آنين بدل حنيننا
سار الليل يسكن نهارنا
كل شئ اصبح لغيرنا
كان زمان الحب غنوه
كان قصيده كان فى غنوه
كان فى كلمة حب بيننا
كان فى يوم يجمع مابيننا
سار زمان الحب فينا
بات يبدل ذكرى لينا
كان زمان كان حياتنا
راح بيحكى الشوق آهاتنا
سارت الاحلام مابين

ا كلها اشباح فى ليلنا
كان زمان الحب غنوه

عطا الاسيوطى