بتطلبى منى اكون وياكى هادى البال
طيب قولى لقلبى يبطل دق ..
وقولى كمان .... لعيونى معاه
تبطل ترسم كل الناس ملامح صورتك
وقولى للسانى ...
يبطل ينطق بحروف اسمك
هو الحب ده لعب عيال
كيف امال بيسموه حب
يابنت الناس الحب معاكى ...
مش كلمه تتقال وخلاص
الحب حياه بيسكن قلب واحساس
ويجر وراه كل جوارح الجسم معاه
ابااه ... عليكى .... يابنت الناس
كلامك واعر ...
والله ... مايخش دماغ
انا طول الوقت ارسم فى خطاوى
وانتى تقولى طيب اهدى
طب اهدى ازاى ...
قولى طريقه تخلى القلب يبطل دق
هو الحب بضاعه تتباع
دالحب كيان مخلوق ويانا
من وقت الخلق ...
من ابونا ادم ... لأمنا حوا
وكمان اقولك ..
اول جريمه فى قلب الارض
بسبب الحب ......!!!!
فاكره هابيل ... ويا قابيل
وبتطلبى من اهدى ...
طب اهدى ازاى ...
وانا وياكى بحس بنار ..
جوه قليبى ... تطق شرار
وتقولى اهدا ,,,
بعد ماسكن القلب هواكى
اهدا ازاى ...
قولولى ياخلق ....!!!
لما الحب بيحرق قلب ..
بيكون مجنون ....
طيب قولى انتى قليبك ...
بيهدا معاكى ... ؟
ولا عليا كلامك بس
ياست الكل ...
سبينى احبك ... كيف ما اكون
انا مجنون وياكى ... بحبى
تقدرى تحرمى طفل رضيع ...
من حضن الام ...؟
ماتقولى اجابه ...
ردى عليا ...
ولا سكاتك يعنى الحيره
فضيها سيره ...
وسبينى احبك كيف ما اكون ...
بتقولى اهدا ....
طب اهدا ازاى
عطا الاسيوطى
ليست هناك تعليقات:
إرسال تعليق