حدوته من جوه ... البيت
من حقى ....
انى اكون جوه فى بيتى
بشارك ...
بالحب الجوانى اللى فى
صدرى ...
اسرتى بالبيت
واسمع وياهم
لحن وكلمات ... لأغنيه
او اتفرج وياهم على ...
فيلم جديد ...
بس غريبه
كلنا فى البيت
غربا عن بعض
انا داخل عالنت
بتكلم ويا الاصحاب
على شعر جديد
وقصيده بنقول
افكارها ...!!!
او بكتب كلمات
اشعار ...
وابص لمراتى ...
القاها ...
بتهرب من خوف جواها
وبدارى احزان جواها
وبتهرب الى لعبه ...
جديده ...!!!
وبعذرها ... كتير
ماهى شايله ...
هموم البيت جواها
وابص لبنتى ... وحبيبتى
الغاليه ... القاها
سرحانه ...!!
سرحانه فى اغنيه جديده
بتغنى معاها ...
او فى مسلسل شغال ...
عالنت ...
واشاغلها بغلاسة اب
وابوس فيها بغلاسه
واحضنها ...
وتقولى ....
ايييييييييييه يابابا
واضحك انا ليها واحضنها ...
والرابع فينا ...
وهو ابنى ...
مشغول دايما
بمكالمة بنت
واما يرن التليفون
يتسحب ...
ويغيب ... ساعتين
ويجى بضحكه ...
وانا بضحك ....
وحتى لو كان قاعد ويانا
يلعب مباراه عالنت
والواحد فينا ...
يروح للشغل ...
وتدور الدنيا ...
ودواره ...
والعمر بيجرى ...
وفى الاخر ...
مدفن بيسعنا ...!!!
وفى حضنه بيرمينا
ونتلم هناك ..!!
بس غريبه ...
بنكون برضو
اغراب عن بعض
ودى ...!!!
حدوته من .... جوه
البيت ...!!!
عطا الاسيوطى
فبراير 2012
ليست هناك تعليقات:
إرسال تعليق